Finansije i Osiguranje - Makedonija

Депозитите во мај пораснаа за 8,6 %, кредитите за 13,4 %

Годишниот раст на депозитите произлегува од повисоките депозити кај двата сектори, при што поголем придонес има секторот домаќинства. Истовремено, кредитната активност продолжува да се засилува, а растот е поддржан од зголеменото кредитирање и на компаниите и на граѓаните, со поизразен придонес на корпоративниот сектор.

Во мај, паричната маса е зголемена за 0,8 % на месечно ниво, најмногу поради растот на готовите пари во оптек, долгорочните депозити до две години и депозитните пари. На годишна основа, паричната маса е повисока за 8,6 %. Вкупните депозити на месечно ниво се зголемени за 0,8 %, главно како резултат на растот на депозитите на корпоративниот сектор. Депозитите на компаниите се повисоки за 2,5 % во однос на април и за 5,8 % на годишно ниво, додека депозитите на домаќинствата останаа речиси непроменети на месечна основа, но се зголемени за 9,7 % споредено со мај минатата година.

Кај кредитирањето, кредитите за корпоративниот сектор бележат месечен раст од 0,9 % и годишен раст од 15 %, при што зголемувањето во целост се должи на кредитите во денари. Кредитите на домаќинствата се повисоки за 1,3 % на месечно ниво и за 10 % на годишна основа.

Според намената, потрошувачките кредити во мај пораснале за 1,1 % на месечно ниво и за 11,2 % на годишно ниво, додека станбените кредити се зголемени за 1,4 % месечно и за 16,3 % на годишна основа. Раст е забележан и кај автомобилските кредити, кои се повисоки за 8,4 % во споредба со тој период лани.

Од Народната банка посочуваат дека кредитите одобрени преку кредитни картички и натаму се во надолна годишна траекторија, со пад од 4,1 %, додека негативните салда на тековните сметки бележат годишен раст од 5 %.